1. Miss ko na ang mga dine-outs natin sa kung saan-saan, mapa-Lucky Plaza, Arab Street, o People’s Park man. Ikaw ang nag-introduce sa ‘kin ng Nasi Goreng Pattaya na sobrang paborito ko, naalala mo? Miss ko na ding gumala kasama ka. Hindi ka kasi mareklamo sa mga mahahabang lakaran tulad ng ibang babae. (Sa ibang bagay lang.) Ang hilig mo pang magpakuha ng litrato sa ‘kin. You regard me as the best photographer that you know, kahit na hobbyist lang ako na walang masyadong alam sa photography. Miss ko na din ang mga kulitan at tawanan natin, sa personal man o sa chat. Pasensiya na kung hindi na kita nasasamahan kahit sa pagsisimba. Kahit naman kasi ikaw eh busy din.
2. Miss ko na ang mga inuman sessions natin. Sa tropa eh ikaw ang pinaka-nakasundo ko dahil siguro halos pareho tayo ng age at maturity level. Ikaw din ang naging takbuhan ko kapag may problema ako. Naalala mo nung natanggal ako sa trabaho? Mahilig ka pang manlibre kapag nakaka-raket ka, at saka magbigay na din ng unsolicited advices. Pati lovelife at katorpehan ko eh pinakikialamanan mo. Ikaw na ang David DeAngelo ng Singapore. Ikaw na ang may magandang girlfriend na Singaporean.
3. Miss ko na ang mga wantusawang telebabad natin sa telepono. Miss ko na ang kuwentuhan, kulitan at tawanan na umuubos sa mga load natin sa telepono dati. Isa ka sa mga naging pinaka-matalik na kaibigan ko dito sa Singapore na nakagaanan ko kaagad ng loob at nasasabihan ng kahit ano. Miss ko na ding tumambay sa rooftop ng high-rise HDB niyo dati sa Toa Payoh. Masaya ako sa kinahantungan ng pagkakaibigan natin, kahit na sa simula ay nagkaroon tayo ng malisya sa isa’t-isa.
********************
Tatlo lamang ito sa mga taong nami-miss ko ngayon. Hindi ko na sila nakakasama nitong mga nakaraang buwan. Ang una’y okupado sa trabaho at mga kapamilya. Ang pangalawa’y okupado sa buhay pag-ibig. Ang panghuli ay bumalik na sa Pilipinas.
